සිල්වත් පැවිද්දෝ ඔබ නිවසට පැමිණෙත් නම්
කරුණු පහකින් බොහෝ පින් රැස් කර ගත හැකිය
කුල සූත්‍රය ඇසුරින්
(බුද්ධ ජයන්ති ත්‍රිපිටක ග්‍රන්ථ මාලා, අඞ්ගුත්තර නිකාය 3 - පිටු අංක 392 - 393 )
යම් කලෙක සිල්වත් පැවිද්දෝ කුලයක් (පවුලක්) වෙත පැමිණේ නම් එහි මිනිස්සු කරුණු පහකින් බොහෝ පින් රැස් කර ගනිති.
- කුලයට පැමිණෙන සිල්වත් පැවිද්දන් දැක එහි මිනිස්සු සිත් පහදවා ගනිත් නම් එසමයෙහි ඒ කුලය දෙව්ලොවට පැමිණීම පිණිස පවත්නා මනා පිළිවෙතට පිළිපන්නේ වෙයි.
- කුලයට පැමිණෙන සිල්වත් පැවිද්දන් දැක එහි මිනිස්සු හුනස්නෙන් නැගිටිත් නම්, මනා කොට වඳිත් නම්, අසුන් දෙත් නම්, එසමයෙහි ඒ කුලය උසස් කුලවත් බව පිණිස පවතින මනා පිළිවෙතට පිළිපන්නේ වෙයි.
- කුලයට පැමිණෙන සිල්වත් පැවිද්දන් දැක එහි මිනිස්සු මසුරු බව අත්හරිත් නම්, එසමයෙහි ඒ කුලය මහේශාක්‍යය (ආනුභාව සම්පන්න) භාවය පිණිස පවත්නා මනා පිළිවෙතට පිළිපන්නේ වෙයි.
- කුලයට පැමිණෙන සිල්වත් පැවිද්දන් දැක එහි මිනිස්සු හැකි පමණින්, බල පමණින් දාන මනා සේ බෙදා දෙයි නම්, එසමයෙහි එම කුලය මහා භෝග සම්පත් ඇතිවීම පිණිස වූ මනා පිළිවෙතට පිළිපන්නේ වෙයි.
- කුලයට පැමිණෙන සිල්වත් පැවිද්දන් දැක එහි මිනිස්සු කරුණු විචාරත් නම්, ප්‍රශ්න කරත් නම්, ධර්මය අසත් නම් එසමයෙහි එම කුලය මහා ප්‍රඥාව පිණිස පවත්නා මනා පිළිවෙතට පිළිපන්නේ වෙයි.
බාගත කිරීමට 
